Tyson Yoshi仲有唔夠一個禮拜就要開騷，日前佢趁閉關前連續兩日出席活動搵錢，佢笑言因為自己冇錢，所以要把握搵錢機會。又笑指自己唔似林家謙咁有錢，可以開騷前幾個月已經閉關唔見人，謝絕出席活動。
7月17號係佢嘅31歲生日，佢透露經已物色咗生日禮物畀自己，仲經已畀埋錢。呢份禮物就係一架棍波車，為咗令自己嘅駕駛技術可以更好，等收到車嘅時候可以開得更得心應手，近日佢就問朋友借混波車操練，非常勤力。
人所共知Tyson對車情有獨鍾，但係佢自爆最近愛上手表，仲形容為比愛車更大件事，現時已擁有三隻名表嘅佢，封口不談名表價值幾多，暗示怕會激嬲太太。
