《星光路上》今集邀請已久未於TVB劇集現身嘅 張松枝 擔任嘉賓，近日現身於《刑偵12》扮演 林保怡 其中一個解離人格嘅佢，接受 潘盈慧 專訪時，就提到劇中陰深造型同演技，同自己嘅想像非常相似。
原來當年佢係偶然被星探發掘，拍攝硬照廣告而入行，期間又曾任模特兒行Catwalk，直至後來加入廣告公司工作，亦不時同步參與各種拍攝。直至後來卡啦OK盛行，就開始參與拍攝唔同MV，繼而正式邁入星途。
當年K歌發展一日千里，松枝就曾先後為金成武、彭羚、譚詠麟同陳慧琳等嘅MV演出，之後仲正式加入TVB，轉型成為演員。有「港版孔劉」之稱嘅佢，之後入讚訓練班修習，今日回看當時亦指自己演技非常稚嫩，更直指與資深拍檔合作，只有一個驚字。
佢最深刻拍攝《刀馬旦》因前輩念錯對白，自己平白遭責累而駁嘴，雖然化作笑談，不過實在膽生毛。後來陸續有機會演出更多戲份，好似《離島特警》、《茶是故鄉濃》演反派，更係花盡心機鑽研。
不過《酒是故鄉醇》先係松枝相對滿意嘅奸角演出，而剛播畢嘅《刑偵12》更係佢滿意之作。其中嘅造型已經花心思，而當中「林昱水」嘅個性，佢更希望將世上每人心中嘅暗黑性格毫不避忌咁演繹出嚟。
亢奮又不岔嘅性格，就連對戲拍檔們都感到壓力太大而頂唔順，結尾一幕高潮大開殺戒打鬥戲，亦係佢最滿意一幕。
曾公開自己患有甲亢嘅松枝，當年因休息不足與壓力而引致，加上曾染疫，所以近年開始定時運動保持體格與健康。雖然《刑偵12》完畢，唔少觀眾都直指松枝演完而可惜，不過呢次專訪佢就透露，正拍攝其他作品，唔使幾耐又會喺TVB欣賞到佢嘅演出喇。
奸得出色嘅佢仲話，非常希望可以參與喜劇演出，仲不時向導演監製提出要求咁話。更指不時都為學生作品扮演輕鬆角色，等自己先過吓癮呀。