《中年好聲音3》冠軍黃博參賽後獲得大批粉絲支持，呢日佢終於舉行首個歌迷會聚會。一眾中聲老友都一齊嚟支持，連參賽導師韋綺姍Rita亦係座上客之一，仲同黃博嚟個合唱，Rita老師覺得黃博比參賽時靚好多，而且充滿自信。黃博與唔同戰友一齊合唱，唱到《朋友》時更十多人一齊上台，憑歌寄意，場面溫馨又熱鬧。
首次舉行歌迷會聚會，黃博嘅心情非常緊張，佢話希望借聚會同大家分享參賽時一啲未曾透露嘅故事。呢日師兄羅啟豪Ramon都有到賀，仲合唱咗首《一眼瞬間》，令人聽得陶醉。
每位中聲戰友嘅粉絲團都有自己嘅稱號，黃博都有親自介紹吓自己粉絲團名字由來，佢話之前有叫做「博派」，另一個粉絲會就叫「芋圓」，因為最初接觸歌迷時黃博嘅廣東話唔正，經常將「會員」講成「芋圓」，所以一不小心就成為咗食嘅「芋圓」。
