周杰倫尾場邀郭富城驚喜登場 兩大天王18年後同台跳Baby Shark

周杰倫三場香港站演唱會嚟到尾場，繼第二場請嚟日本男神山下智久引起哄動之後，呢晚佢更請嚟舞台王者郭富城做嘉賓。城城嘅出現，即刻令全場熱血沸騰，周董更同城城大跳《Baby Shark》，跳完兩人仲嚟個大大嘅擁抱，周董忍唔住話「太開心啦」。

周董相隔18年再次邀請城城做嘉賓，兩人又唱又跳，更細訴二人嘅淵源，城城話周董幫過佢寫兩首歌《愛情》同埋《永遠愛不完》，而呢首歌更係城城出道25年紀念同歌迷相處嘅時光，所以特別有意義，呢晚佢哋亦有一齊合唱呢首歌，有城城喺度當然唔會只係得情歌，之後城城就為全場送上一曲《狂野之城》，令全場high爆呀。