「十優港姐」 麥明詩 為機師老公 盛勁為 誕下兒子後，不時都喺社交平台大曬老公嘅湊B日常，話咁快B仔經已100日大，兩夫妻就為囝囝搞咗個百日宴。好友鄭𧗠峰同圈外親朋亦都帶埋小朋友赴會，連4月時亦升呢做媽咪嘅 何依婷 亦有參與。
兩夫妻亦喺自己嘅社交平台Po出百日宴情況，現場更有Live Band演出，而盛勁為更加大曬歌喉連唱多首歌曲，其中一幕佢更抱住B仔唱起《單車》﹐唱住「如孩兒能伏於爸爸的肩膊誰要下車」超級有Feel，新手老竇更係一臉陶醉。
而升呢媽咪嘅Louisa亦貼出一張相，B仔背住鏡頭望向蛋糕，對小朋友嘅正面樣貌完全保密，蛋糕嘅名牌上只見「盛B百日宴」， B仔嘅名字被後期加工字樣遮住，為B仔嘅私隱保密做到足。
Louisa同老公3月正式榮升父母，起初仲對月BB嘅性別保密，直至5月時Louisa前男友林作嘅媽咪王莉妮探BB時，曾將B仔正面樣喺社交平台曝光，雖然事後好快就刪相，不過之後就掀起一串風波。而呢次百日宴就令Louisa對B仔嘅私隱功夫更加注意，而呢日身為B仔嘅契婆婆嘅林作媽咪亦未見現身。
