江若琳 同前經理人公司寰宇，曾因合約糾紛而對簿公堂，事件擾攘近7年，法官終於2022年裁定江若琳與寰宇合約已於2014年5月完結，而江若琳可獲得其音樂產品上，扣除必要支出後嘅全部收益。
於法庭判決後已逾兩年時間，已重新於樂壇出發兼享受一家三口家庭樂嘅Elaine，7月1號突然公布一個好想同大家一同「見證」嘅消息，佢非常激動咁話：「我！所！有！音！樂！作！品！返！黎！啦」
Elaine見到自己多年嚟嘅音樂作品母帶同獎座喺眼前，眼泛淚光指失而復得嘅感覺原來咁美麗，感激一切，20年嚟嘅心血，作品通通返到自己身邊，係一個最好嘅時光出現，人生崎嶇嘅上半場畫上一個美麗嘅句號。
同時佢覺得係意味自己將會有一個好好嘅開始。佢亦決定將呢一幕震撼畫面記錄落嚟，佢話曾經努力過嘅回憶終於可以重見天日，曾經因為音樂作品背負巨債，但今天，回望眼一切值得！無價！
佢特別感激20年嚟共同努力過嘅戰友，感激20年嚟所有人同事，感激一直支持江若琳唱歌嘅朋友，係你哋每一位令佢知道唔好放棄一定會有奇蹟出現，佢亦宣布下月尾將會舉行演唱會，以歌聲答謝大家。
