韓國天團防彈少年團BTS七位成員RM、Jin、SUGA、J-Hope、Jinin、V同柾國用咗三年時間陸續完成兵役，上個月有五位成員相繼退伍，而ARMY苦等超過兩年，終於等到七人合體直播，唔少粉絲聽到防彈招牌嘅打招呼手勢以及隊呼，即刻開心到爆喊。
BTS七位成員7月1號下晝透過全球粉絲社群平台進行直播，除咗久違嘅問候，仲宣佈將於明年春天回歸推出團體專輯。今個月佢哋就會出發去美國進行音樂創作，成員預告「這張專輯將會是真正融入所有成員想法的團體專輯，我們打算完全回歸初心進行創作。」
隊長RM表示：「從明年春天開始，我們也會展開世界巡演，將走訪世界各地，請大家拭目以待。」柾國亦話：「這次專輯的創作，是我們回歸初心的過程。」而Jimin則表示：「會盡快準備好，不讓粉絲久等。」Jin亦補充：「即使在不同國家之間來回，我也會參與其中。」
ARMY除咗開心聽到BTS嘅音樂計劃，更開心嘅一定係見到成員一如既往嘅開心打鬧，展現團魂，好似Jimin對住鏡頭感嘆自己因為發福顏值不再，啱啱退伍嘅髮型亦難以接受，V即刻搞笑安慰佢到明年春天回歸前仲有時間減肥，之後幾位成員仲一齊模仿J-Hope喺個人演唱會上爆喊嘅樣，連J-Hope自己都忍唔住爆笑。
BTS自2013年出道以來，唔止風靡全亞洲，仲成功登上國際舞台，佢哋擁有6張美國告示牌冠軍專輯以及6首「Hot 100」冠軍單曲，放眼亞洲樂壇無人能及，而呢場30分鐘嘅直播，累積實時播放次數更高達730萬，證明人氣不減。
