周家蔚同洪天明嘅13年婚姻日前傳出疑似亮起紅燈消息，兩夫妻被指「各有各玩」，更有傳媒影到家蔚「一后三王」同三位男士夜蒲。不過天明已透過律師出聲明以正視聽、保護家人，並透露一家人正喺汕頭旅行，度過歡笑美好時光，家蔚為夜蒲事件作出澄清後更喺社交平台連續出片，分享一家四口汕頭旅行Vlog，當中仲有錢家樂、湯盈盈，兩家人開心出遊齊齊食雪糕，並表示：「我們很好，謝謝大家關心。」
雖然有人認為家蔚嘅旅遊片係同天明一齊夾埋扮恩愛，但兩公婆繼續懶理閒言，家蔚喺7月1號、亦即係天明生日當晚，就喺社交平台發深情祝福，表示：「親愛的老公@洪天明，我想對你說聲謝謝。感謝你一直以來的陪伴和支持，給了我滿滿的幸福，祝你生日快樂，健康平安，事業有成，我們白頭偕老！！！ 」力證夫妻情依然甜蜜恩愛，更附上一家四口幸福又溫馨嘅合照，作為壽星嘅天明更捧住一紮鮮花，相信應該係老婆嘅心意喇！
