「做人冇夢想，同鹹魚有咩分別？」呢句嚟自電影《少林足球》嘅經典對白，相信唔少人都聽過，周杰倫 2號喺社交平台，同呢句對白嘅原主 周星馳 一齊出po，當中就重提到呢句說話，即惹網民揣測佢哋嚟緊係咪有咩合作。
啱啱完成香港站演唱會嘅 周董，日前就相約星爺秘密見面。2023年星爺同周董相約一齊品嚐美酒，當時佢哋各自拎住一支紅酒合照；而呢次相見，佢哋就選擇喺可以俯瞰香港景色嘅池邊，邊品茶邊傾偈。
相中所見，雙周雙雙戴上黑超、腳踏白色波鞋，周董更踩住一個足球，而帖文中佢哋就寫道：「聽說做人冇夢想，就同鹹魚無分別。所以我頭戴周董嘅帽，眼戴周董的酷墨鏡，擋住俗世風沙！佢腳踩少林足球，手捧一壺夢想，我哋周周倆，一齊沖走現實嘅苦澀，泡出人生嘅香甜！今晚慶功嗰陣，我本來淨係諗住買罐汽水算，點知緣分咁啱，手一伸就攞住支1985 Jayer。隔籬仲有匹1947白馬望住我，問：『開唔開呀？』我話：『開！夢想無得等啊！』」
佢哋喺文中提到嘅 「1985 Jayer」同「1947白馬」其實係紅酒，據資料顯示，白馬堡 1947 （CHÂTEAU CHEVAL BLANC 1947） 估值$304,375美金一支，而 Henri Jayer, Richebourg 1985 ，喺2023年嘅拍賣成交價就要港幣500,000， 雙周嘅夢想果然價值不菲！
今次雙周會面，有網民猜測佢哋係咪要合作拍新戲，因為之前正忙於拍攝新作《少林女足》嘅星爺，每次post出嘅合照人物：劉嘉玲、宋康昊、中國足球運動員李佳悦、趙麗娜等 ，都似乎同新戲有啲關係。不過亦有人估計，雙周今次可能係要合作出茗茶，因為之前星爺曾出post集思廣益：「一支穿雲箭千軍萬馬來相見，各路英雄豪傑集思廣益，我和 @jaychou 想合作，除了賣酒，還可以做什麼？」，而今次二人手持茶杯，加上佢哋喺帖文中寫道「手捧一壺夢想」，估計係有意推出與茶有關嘅產品，至於周董腳踩嘅足球，就係為星爺宣傳新作《少林女足》。