女團「Idol Girls」嘅一期生，日前聯同師兄 KING吳崇銘 一齊出席活動，大唱經典廣東歌，一班女仔仲整蠱師兄，力邀一齊跳唱《心急人上》，好彩KING順利過關冇被考起。
近年以「DJ King」身份主力製作電子音樂嘅KING，久未喺公開活動獻唱，佢直認初時有點緊張：「好耐冇用呢個身份（歌手）見大家，都有少少緊張，仲要帶住成班小師妹，原本諗住着得校園feel少少襯返佢哋，而家搞到我好似阿Sir咁。」眼見一班活力十足嘅小師妹，KING都被可愛氣氛感染跳舞派心：「見到佢哋成班聚埋，真係好有力量，啱啱又唱完《掛念你你好嗎》，令我諗起C AllStar班兄弟，有人一齊玩真係好開心。」跟一班小師妹跳唱之後，KING都表示跳唱真係好好玩：「有機會我都想做跳唱歌，到時再搵佢哋一齊玩。」
一期生喺活動後，走到粉絲區派福利簽名同派心合照，佢哋特別感激師兄現身力撐：「我哋仲係練習生就可以同KING一齊演出，喺佢身上學到成為歌手嘅專業。開騷前突然落咗場大雨，我哋個個都好擔心，但係KING同我哋講『The show must go on』，唔可以令嚟咗嘅人失望。」仍然要為跳唱基本功訓練嘅一眾一期生，佢哋都自知仲有好多不足之處，會努力加油，亦感激粉絲每次都現身支持，令佢哋非常感動。
