李治廷福建出戰街道賽炒車 終於與餅印王力宏同框演出

李治廷Aarif 好耐無喺香港露面，呢日佢同內地演員 常華森 一齊現身品牌活動。Aarif近年醉心賽車，成日喺內地出賽，早前佢就喺福建完成街道賽，不過當日佢嘅狀態就好麻麻，加上當日有成37度高溫，佢件冰衣喺第二圈已經懷咗，之後都頂硬上，後來更不幸炒咗車，幸好人安然無恙，但消息都令屋企人好擔心，不過炒車並無嚇怕Aarif，嚟緊佢仲會迎戰北京街道賽。

Aarif日前驚喜現身王力宏北京演唱會，其實Aarif出道時，因為同Leehom撞樣而被封小王力宏，呢次終於可以同異父異母嘅孖生阿哥同框合唱，佢都話好難得，仲笑指當初獲團隊邀請時，抱住敢請我就敢上台嘅心態，因為呢個都係Aarif 15歲時嘅里程碑，不過Aarif就覺得自己同Leehom唔似樣，大家各有風格，想借住今次嘅玩笑娛樂大家，令觀眾對呢個話題可以放輕鬆，話晒都講咗十幾年，可以講吓第二啲話題。