江若琳同前公司長達十年嘅合約糾紛，喺舊年年初終於完結，佢終於可以喺演藝路重新出發，Elanne亦宣布將於下月舉行演唱會，相隔七年可以再擁有自己嘅舞台，佢都相當感觸，仲選擇用證人呢個英文字做個唱名。
Elanne話以前望住呢個字會覺得好恐懼同埋唔開心，今次當佢再見到呢個字，佢覺得好有感覺，因為今日再面對呢個字，竟然係一個好有意義嘅字，因為好多歌迷都見證自己嘅成長、經歷嘅風浪、結婚生仔，再去到重新追夢。
咁重要嘅時刻，問到會否叫老公Oscar做嘉賓？Elanne就一口拒絕話千祈唔好，因為老公會破壞咗成件事，加上Oscar本身好怕醜，只敢喺車廂中唱歌，而Elanne亦透露當日安排咗重要任務畀老公，就係負責照顧囝囝。
Elanne日前分享開箱片，宣布接獲舊公司通知，接收佢多年嚟嘅音樂同演出作品母帶兼獎座，佢話呢個過程足足等咗廿年，因為十年喺娛樂圈工作，再加上十年官司生涯，而今次喺宣布開騷前突然收到母帶同獎座，佢覺得係天賜嘅禮物，而事前係冇任何預計過會收到，而過往嘅作品，亦將會稍後重新喺串流平台上架。
