TVB演員黃庭鋒今日忽然喺IG貼出一張躺喺病床準備做手術嘅相片，仲話「醒番後會係一個更強嘅我」，方力申、陳自瑤、冼靖峰、胡鴻鈞、張寶兒及蔡國威等好友紛紛留言祝佢早日康復。
37歲黃庭鋒透露因nose block（鼻塞）喺醫生建議下做手術，要留院休息2日，陳敏之亦留言：「一刀切好呀👍早日康復💪。」黃建東則寫道：「早日康復，快啲斷尾❤️💪🏼💪🏼」
據知長期鼻塞未必係鼻敏感，有機會係腺樣體增大引致呼吸困難，大腦持續處於缺氧狀態，易影響病患者睡眠，令專注力不足及渴睡，嚴重者有機會導致睡眠窒息症。醫生會按病情為患者施鼻塞手術，將腺樣體完全切除，術後復發機會低。
黃庭鋒喺2022年去北京採訪冬奧，試過連日喺低溫、高山採訪，曾因缺氧暈倒被送入院，當時佢有一刻唔係好唞到氣。據網上資料顯示喺極少數情況下，腺樣體增大可導致到達高原地區時，更容易出現呼吸道問題，從而加劇高山反應症狀，之不過腺樣體增大同高山反應係兩種唔同嘅醫學問題，並唔等於腺樣體增大會引起高山反應。
