喺2015年女子組合FFx一首《Sugar Baby》可以話制霸網絡，成為經典嘅MK Pop，由於呢首歌嘅MV製作同四位成員嘅造型都相當粗糙，所以傳出呢個MV僅僅用咗九百蚊嚟拍攝。
女團VIVA最近就開展「女團聯乘企劃」，搵咗唔同嘅經典女子組合做訪問，繼As One、Super Gir及HotCha後，今次VIVA就應網民強烈要求，成功召喚到FFx成員Christy出山！VIVA仲同Christy一齊翻跳FFx成名作《Sugar Baby》！
Christy亦趁呢個機會反擊九百蚊拍MV嘅說法，佢指當日自己放學後趕到拍攝現場，化完妝出嚟見到現場set好晒路軌同cam，Christy表示：「係低成本製作嘅，我完全承認，但係啲人話九百蚊拍MV，我就唔知邊度聽返嚟， 九百蚊拍到啲咩？可能化一個妝？我都唔知。」
15歲入行加入FFx，Christy指當時純粹覺得得意所以先去試，不過佢就話對此完全唔後悔，因為佢哋完成晒所有女團里程碑，至於講到最辛酸時期，Christy指曾經要對住空氣表演：「得一兩個人經過會停留，但佢哋唔知我哋係邊個。」而最感動嘅就係唱《Sugar baby》唱到副歌時，竟然引起全場大合唱，佢哋去大學表演時，一話影大合照，全部學生衝上台，令Christy覺得佢哋都唔係好差啫。
唔少人睇返自己當年青澀嘅演出時都會覺得異常尷尬，不過Christy就話自己冇呢個問題：「有啲情結嘅，呢首歌唔係一首歌，對我嚟講係好重要嘅嘢，冇任何嘢可以攞得走呢件事。」佢仲眼眨淚光隔空跟FFx其他成員喊話：「⋯⋯ 如果你睇到呢條片嘅話，我希望你哋睇到呢條片嘅時候係幸福嘅回想返我哋以前嘅經歷。」
VIVA嘅「女團聯乘企劃」嚟到最終章，佢哋坦言製作呢個女團系列時學到好多、亦感受很多，「佢哋經歷過嘅、分享過嘅，都係我哋而家正正經歷緊。就好似我哋首歌《不夠浪漫的我們》，女團從來都唔容易做，但團魂永遠都喺度。」
