黃翠如同老公蕭正楠喺今年3月迎嚟佢哋愛情結晶品「蕭哈哈」，不時喺網上分享初為父母嘅喜悅，一家三口相當幸福，兒子「蕭哈哈」三個幾月大，翠如同阿蕭為阿仔喺淺水灣舉行田園風百日宴，以彩虹作主題，當日出席嘅賓客星光雲集，今日終於喺網上分享阿仔「蕭哈哈」嘅可愛樣，獲不少網民讚靚仔。
翠如同阿蕭之前喺網上擺相都遮住阿仔嘅樣，今日終於曬出阿仔靚樣，並留言：「『蕭哈哈』原來你100天。到現在每天早上被你嘰哩咕嚕叫醒，爸爸和媽媽還是會蠢蠢地互問，『這是我們的BB嗎』，是的，這就是我們的蕭哈哈🌈在大家的祝福下出生，也在大家的祝福下辦了一個充滿愛的百日小派對🎈感恩我們兩個家庭擁有了這個哈哈。」
不少網民見到哈哈嘅外貌大讚好得意，紛紛留言「係有啲角度似大蕭生，有啲角度就係小翠如，🤣好神奇啊🌈」、「好靚好靚❤️❤️❤️❤️終於見到haha個樣❤️😍😍😍😍好似爸爸媽媽一樣咁靚❤️❤️」。
而翠如感謝當日所有前嚟出席百日宴嘅朋友仔，「感謝天朗氣清襯托這一個夢幻一般的場地，讓哈哈有個不一般的100天🌈」，同時感謝場地同事特別搵咗一張BB床畀哈哈喺小房間甜睡，「還總是擔着遮，擔心哈哈會被太陽曬親，整天哈哈都很甜🥰」，翠如希望阿仔喜歡呢份禮物，更希望阿仔簡單快樂健康成長，翠如仲透露呢日阿仔哈哈喺切蛋糕前嘔咗少少奶，相信蕭哈哈咁可愛，啲賓客都唔會介意啦！
