蔡潔 獲美容品牌再續約，將連續第6年為品牌擔任代言人，Jacky 2013年參選國際中華小姐後，來港發展多年，近來更成為多部重頭劇嘅中流砥柱，而客戶長期支持又再續約，就令Jacky更加開心喇。
佢話：「我嚟香港發展差唔多12年，有一半時間都同客戶一齊度過，好感激佢哋好似屋企人，時刻咁照顧我，細心護理我嘅肌膚，等我隨時都可以最佳狀態示人。」Jacky又指初擔起代言重責時自己只係小演員，不過獲老闆垂青邀請非常感激，至於提到代言金額，Jacky就笑言：「每年都有加少少，都係一個好合理嘅升幅。」
Jacky又指自己護膚心得係越簡單越好：「其實我唔算好貪靚，唔開工我會盡量素顏，有時間就會去客戶到做美容療程，因為佢哋知道我需要啲咩，幫我護理好皮膚，所以我平時都係簡簡單單用吓cream就可以素顏出門。」
佢有份演出嘅《執法者們》熱播，當中Jacky仲會被吊起虐打，不過佢就表示最期待觀眾睇到佢同黃宗澤嘅感情戲：「被吊起虐打呢場係一個好特別嘅體驗，但其實我最想觀眾留意到我同老公黃宗澤嘅感情線，好期待大家有咩反應，我第一次睇時係覺得好感動，係有喊出嚟嘅！」
當問到現實中嘅擇偶條件時，Jacky就話：「每個女仔喺人生都有唔同選擇，每個人生都有一個主力嘅事業，唔係每日都要返工呀，可能你鍾意去旅行種花，咁你人生就有意義，而我目前就係最鍾意工作，我希望暫時努力工作先。」
下月佢就會於動漫節推出新漫畫《失敗的我被放上了置物架》，仲已入圍第四屆「港漫動力」，Jacky希望大家多多支持，見到鏡頭以外不一樣嘅自己。
