周杰倫與陳冠希曾喺經典電影《頭文字D》飾演「藤原拓海」與「高橋涼介」，成為許多賽車迷心中嘅經典組合，周杰倫去年喺台北小巨蛋演唱會上，陳冠希曾驚喜現身捧場，掀起場內高潮 ，近日周杰倫完成香港站演唱會，飛往英國睇溫網比賽，陳冠希亦喺當地睇球賽，二人私下好老友，周杰倫噚日喺IG分享合照，見佢哋一齊睇奈良美智畫展。
周杰倫同陳冠希曾喺20年前拍過電影《頭文字D》，呢次再度合體，勾起唔少影迷回憶殺，更紛紛留言叫佢哋拍《頭文字D》，周杰倫當年飾演主角藤原拓海，陳冠希飾演賽車手高橋涼介，一直想邀拓海加入車隊。
周杰倫呢次出post以「藤原拓海」以及「高橋涼介」兩個角色設計惡搞台詞，見涼介問拓海「要加入我的車隊嗎」，拓海答應後，涼介居然回答「你先微信支付300塊」，原來呢個笑話係來自陳冠希曾遭人冒名詐騙，當時唔少粉絲收到自稱係陳冠希本人寄嚟訊息，內容係「我在洛杉磯遇到很壞很壞的人，微信轉帳300元，幫助我回香港」，意外讓「微信轉帳300元」成為網路笑話，原來周杰倫都有留意呢單新聞！
