7月5號係國際天后CoCo李玟離世2周年，台灣歌迷會特別舉辦「愛就要趁現在｜CoCo李玟31週年紀念活動」，於今年1月於台北金寶山揭幕嘅「永遠的月光愛人」CoCo紀念雕像前，紀念與回憶偶像。
紀念雕像由李家特別為台灣歌迷設立；藝術雕塑家王志文耗時一年打造，象徵台灣係作為CoCo音樂發跡嘅起點，亦感謝歌迷一路以來對佢嘅支持。今年係CoCo首張個人專輯《愛就要趁現在》推出31周年，歌迷會成員認為CoCo聲音陪伴無數人成長，而佢留下嘅音樂同精神，至今仍然持續感動世界。
2023年7月5日CoCo告別凡塵，兩年700多日過去，但唔少歌迷心中嘅悲傷從未遠離，呢日唔少歌迷們帶住鮮花、小禮物同思念，來到CoCo雕像跟前席地而坐，靜靜聆聽住CoCo嘅歌聲，勾起往日各種回憶。
歌迷又準備「愛就要趁現在」紀念品，歌迷們亦同雕像合照打卡，又分享自己同CoCo嘅故事同記憶，大家又親手寫低對CoCo嘅祝福同想念之情。而CoCo於1999年底發行嘅英文專輯《Just No Other Way》，年初再次推出紀念黑膠版本後，唔止成為收藏迷珍藏，亦榮登大型書店暢銷榜黑膠類第4名。而升級4K畫質嘅《Before I Fall in Love》MV，於視頻網站公開後，短時間就突破150萬次觀看。
