Tyson Yoshi繼續佢嘅個唱第二場演出，Tyson先與全場萬人大合唱，為新婚嘅「程太」Christy祝壽。繼而又將嘉賓 林家謙 推下「海」，成為「啟德插水第二人」。
Tyson呢晚戴上白色隱形眼鏡散發神秘感，又登上王座拎起「寶劍咪」獻唱《My New World Order》，之後又捨棄邪氣轉換成「英雄」角色，吊上半空演唱《 LosE tO yOu》，配合螢幕極具藝術感嘅動畫，恍如喺外太空漫步一樣。
剛為人夫嘅Tyson，又即場向太太示愛，送上神曲《Christy》祝賀生日，全場觀眾又應邀齊齊合唱生日歌為佢賀壽。Christy此時登上王座手執玫瑰花升上台，點知Tyson竟一臉嫌棄，指唔想收花，又話：「我明明叮囑導演唔好俾咪你」，似係擔心Christy再爆「潛水艇」閨房笑料。之後仲以太太趕時間飛歐洲準備婚禮為由，親吻趕Christy落台，過程搞笑又甜蜜。
之後特別嘉賓 林家謙 登場，兩人合唱《特倫斯夢遊仙境》，家謙仲笑言：「我專誠嚟騎白馬，因為你個唱海報騎黑馬，不過你今日要做白馬。」Tyson即揹起家謙跑勻全場，之後仲要家謙有揹有還有成為第二個喺啟德插水的男人，臨將家謙推向台下時更大叫：「林家謙你唱歌真係好難聽，我想掟你落山呀！」語畢即一手將佢推入「人海」，家謙就無奈苦叫話：「唔好抽水呀！」
家謙成功「返上岸」後，兩人開始鬥嘴，Tyson搞笑問：「林伯ok嘛？」之後兩人繞場一周時，家謙又語帶相關話：「點解你咁長(指舞台長度)？」而Tyson扮幫妹妹要家謙演唱會門票後又笑說：「其實我只係講吓，其實我唔想妹妹睇你演唱會，哈哈。」
家謙又因為未能赴歐洲出席Tyson婚禮而內疚，於是率先送上「新婚禮物」半首歌Demo補數Tyson高呼：「好大壓力，因為你啲歌唔係人唱嘅」，不過播出10秒後，Tyson就改變主意嗌收貨，仲揚言明年就會推出。
