高海寧（高Ling）喺《新聞女王》憑許詩晴一角奪得《萬千星輝頒獎禮2023》最佳女配角獎項，最近喺深圳忙拍劇《新聞女王2》，見佢不時喺網上分享開工相，寓工作於娛樂，背後卻隱藏辛酸及無奈，高Ling早前接受鄭丹瑞網上節目訪問，談及曾飽受情緒問題困擾，自爆曾陷抑鬱深淵，試過想衝出馬路，又試過驚恐症發作拍劇突然崩潰， 拍《新聞女王》時曾一度復發，最後更無奈停工。
高Ling回想喺疫情喺內地獨自隔離，加上外公離世，佢因工作未能見親人最後一面，令高Ling大受打擊，曾有輕生念頭，高Ling坦言當時喺內地逗留半年，要自己照顧自己，有一種漂泊感到好孤獨，高Ling本身樂觀開朗，好少諗唔開心嘅嘢，「我係好少傷害自己，我覺得割手嘅人好傻，皮膚咁好點解要割花佢。但原來去到一刻會發現我救唔到自己，我睇所有嘢都好負面，會不停自己哭」，高Ling話發現情緒出現問題後，好快尋求醫生幫助。
高Ling指外公喺嗰段時間離世，佢因工作無法見外公最後一面，令佢情緒一觸即發，「當我返去嗰陣，儀式已經完成，好多人生嘅事喺嗰一刻爆發，我突然無法承受」，高Ling曾萌生極端想法，高Ling回想有日同媽媽去超市買嘢，拎住兩袋嘢企喺馬路，當時等緊交通燈，有一輛貨車經過，「喺腦海產生一個想法，如果我走出去會點呢？嗰吓我下意識地後退咗一步，然後我驚覺點解會有呢個想法」。
高Ling翌日去睇精神科醫生，醫生話佢係公眾人物，唔會將佢嘅經歷記錄落嚟，令佢放心講出心事，高Ling當時有驚恐症徵狀，突然會覺得好害怕人群，恐懼感令佢全身僵硬、無法呼吸，然後跌倒喺地上就嚟暈倒，佢需要服用鎮靜劑先能平伏，高Ling直言呢次係極恐怖嘅事，感覺好接近死亡。
高Ling有段時間好怕拍崩潰戲，透露拍《新聞女王》曾一度導致驚恐症發作。高Ling有一場戲要講對白，另一演員要跳落嚟被車撞，高Ling好怕講錯對白，「每講錯一次，佢就要多跳一次」，高Ling當時腦海一片空白，更越嚟越緊張，直接崩潰爆喊，無法演嗰場戲，嗰場戲後嚟要取消改期再拍，高Ling亦覺得好對唔起，自己當刻承受唔到呢種心理壓力。高Ling經歷抑鬱症後，而家定期透過冥想調節心情，保持平靜，努力走出陰霾。
防止自殺求助熱線：
「情緒通」精神健康支援熱線：18111
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
社會福利署： 2343 2255
撒瑪利亞會熱線(多種語言)： 2896 0000
東華三院芷若園： 18281
醫管局精神健康專線： 2466 7350