陳瀅（Jeannie）近日為TVB準備新劇《璀璨之城》角色，成功搣甩圓潤身材，減磅後變身窈窕體態，望落真係輕型過之好多，對比近日佢喺《執法者們》嘅感覺已經睇得出差別。
難得保持一副好身材，喺炎炎夏日當然嚟個大解放啦！陳瀅最近忙中抽空相約好友出海，好姊妹何雁詩（Stephaine）自信地大曬fit爆身材。身穿比堅尼嘅陳瀅跪喺甲舨上，展露纖薄身型同大半個圓潤臀，雖然相中嘅陳瀅未有正面望鏡頭，但呢個側面嘅線條已夠晒殺食。
陳瀅日前出席活動時坦承為挑戰性感角色，早於年初進行減肥，望以最佳狀態呈現觀眾眼前。此外，遊船河期間當陳瀅笑稱進行另類才藝表現，成功將食物拋到半空再吞落肚，睇得出佢對自己嘅表現相當自豪。
Stephaine喺烈日嘅甲舨上玩得勁興奮，好享受日光浴之餘，更開心得又瞓又跳擺甫士影相，青春魅力十足。Stephaine就同好友暢聚，而老公鄭俊弘（Fred）就乖乖做個暖爸，教囝囝Asher游水，獲網民大讚。
陳瀅同Stephaine遊完船河後意猶未盡，之後仲同「SIXTERS」，賴慰玲Winki Lai 、陳嘉寶Anjaylia Chan、吳嘉熙Cheronna Ng同之前忙於拍《少林女足》嘅蔡詩貝Sisley Choi都歸隊，六姊妹一齊打邊爐大擦一餐又玩街拍。
