42歲印度裔演員陳振華（Ricky）曾憑《金宵大廈》飾演警察「Raj Sir」為人所知，佢去年8月確診患鼻咽癌四期，陳振華日前喺網上分享抗癌一年嘅心路歷程，當中神經劇痛最難忍受，好似有數千隻螞蟻喺面上躝，至今已接受12次化療及33次放射治療。
陳振華喺2020年被老婆Alison爆出軌及家暴，令其形象插水，一度消失於幕前，佢早前喺抖音上載新片，談及已完成12次化療，坦言抗癌過程並唔容易。
陳振華感激網民支持及鼓勵，仲有阿女陳思語嘅窩心講「爸爸加油呀」，令陳振華感動不已。陳振華話尚未治療期間，右邊臉麻痺，「有數千隻螞蟻好似喺我塊面上面係咁躝，喺眼球、眼珠入面係咁喺度抓，好痛」，當時食止痛藥都無法止痛，陳振華抗癌將近一年，已接受12次化療及33次放射治療，佢指接受頭兩次化療時病況冇好轉，直至第三次化療後，情況有所改善，「突然間，面神經一啲痛楚都冇，當時開心到不得了」。
陳振華曾因化療狂甩頭髮，更一度暴瘦30磅，佢話而家已減少好多痛楚，「直頭神經係冇痛，開心到不得了，仲可以食好多嘢，聞味道冇想作嘔，好正，最重要唔痛，唔使眼球好似被挖出嚟咁痛」，佢更為同路人打氣，希望喺抗癌路上嘅戰友們一齊加油。
