「Only you can take me 取西經～only you～」音樂一響歌詞一唱，相信勾起路少觀眾嘅回憶，同樣呢一幕亦勾起唔少莫文蔚西安站巡演嘅歌迷回憶，因為佢呢場請嚟 唐三藏 羅家英 擔任嘉賓。
着住紅色印花西裝嘅家英哥，獻唱佢喺電影《西遊記大結局之仙履奇緣》入面唱嘅《Only You》，一開口就令全場歌迷興奮尖叫，家英哥邊唱邊做動作配合歌詞，而Karen則在旁為其和音。
唱完呢首經典作品，Karen就同大家講起佢同家英哥嘅相識經過，佢指二人係喺31年前認識，有好多人都會好奇點解佢會講家英哥做嘉賓，Karen解釋當年佢哋喺西安做咗一件好重要嘅事，就係31年前佢哋喺西安拍咗《西遊記第壹佰零壹回之月光寶盒》同《西遊記大結局之仙履奇緣》，二人亦係透過呢兩部電影而認識。之後二人又喺台上憶述當年拍戲時嘅經歷，家英哥指記得當年係喺零下氣溫下拍攝，而Karen就話最記得係當年一入組，大家就好似瘋咗，一拍就拍30幾個鐘，完全唔休息，佢笑言同家英哥一齊經歷咗唔少苦難。
網上一直有指《Only You》嘅惡搞詞係由導演劉鎮偉填寫，不過演唱會上Karen同家英就為大家解開呢個謎，Karen指呢首歌嘅歌詞其實係出自當年電影嘅美術指導 梁華生 手筆，而呢日梁華生亦有到場睇Karen演唱會，並大方起身同大家打招呼。
另外，家英哥早前喺訪問中自爆四度患癌，而今次係前列腺癌，不過家英哥話唔打算接受化療和電療；日前汪明荃出席活動時，被問到丈夫健康情况時，阿姐指家英哥嘅病情發展好慢，未來會有好多新藥，而自己就尊重對方嘅決定。
