容祖兒回應英皇國際陷百億債務危機 透露楊受成曾稱「唔太大問題」

富商楊受成掌舵嘅英皇集團，旗下嘅英皇國際最近陷入166億債務危機，作為英皇娛樂歌手嘅容祖兒（Joey）今日出席活動時亦有回應此事，相信見慣風浪嘅老闆楊受成必定能克服難關。

Joey受訪時表示以市民角度去理解，指香港經濟唔好，好多唔同嘅大集團都會有呢啲新聞出現，Joey話呢間公司係自己由細到大，覺得公司每一個危機都可以一一衝破，呢次都唔例外，相信楊生帶領下唔會有太大問題。

Joey又指楊生有私底下搵佢傾，稱「其實唔太大問題，會處理」，Joey讚楊生係一個好老闆，有向每位藝人去解釋，或者講番而家係咩情況，唔想令大家關心，Joey話大家都冇擔心過，繼續努力做嘢。