《聲夢傳奇2》嘅情侶檔 趙小婷 同 陳昊廷 自從公開戀情後經常高調放閃，日前適逢Timothy嘅25歲生日，Pamela就係社交平台貼出多張sweet爆嘅情侶合照，祝男友生日快樂。
Pamela公開嘅應該就係上月中佢哋去海南島三亞旅行時影低嘅合照，估計兩人係旅行慶祝Pamela終於完成港大醫科學業，正式升呢做潘醫生。當時Pamela po出一系列陽光海灘嘅靚相，雖然Timothy冇入鏡，但Pamela就credit男友，大方承認靚相係由男友揸機。今次男友生日咁開心，Pamela於是公開二人合照，其中一張一對小情侶喺藍天白雲下相擁嘅剪影，浪漫指數爆晒表。
Pamela喺社交平台除咗祝男友生日快樂，仲寫到「Here's to many more adventures together」。聲夢好友包括張馳豪、黃奕斌等都有留言祝賀。最搞笑係曾經擔任聲夢導師嘅JW王灝兒竟然留言話見到呢幾張相以為二人訂婚添。
