《中年好聲音》唱將周吉佩、羅啟豪、李佳、古淖文、譚輝智、顏米羔及黃劍文等呢日現身拍攝新一輯造型照，輝智以短褲造型上陣，與佢風趣性格相當合襯，輝智呻要chok型仔甫士好難，後嚟發覺坐喺度擺甫士最舒服最輕鬆！
佳佳除咗教唱歌，扮靚擺甫士都相當在行，佢話細個夢想做超模，可惜身高唔夠高；而吉吉就係「性感擔當」，以中性打扮露出腰間，吉吉都好鍾意呢個造型，計劃嚟緊如果有演唱會就試吓呢啲造型。
羅啟豪呢次挑戰唔戴眼鏡影相，仲試吓帶有搖滾風格嘅造型，希望擺脫乖乖仔形象。平時有操開肌肉嘅古淖文就包到冚影相，原來呢身靚衫就由客戶贊助，仲係因一次商演偶然借番嚟，顏米羔都好羨慕古淖文爆肌身材，目前佢默默操fit，希望有日可以喺舞台曬努力成果。
