78歲嘅羅家英喺5月尾接受內地傳媒訪問時，驚爆自己第四度患癌，仲話自己最終決定唔會接受電療同化療，而太太汪明荃日前受訪時，亦表示尊重家英哥嘅決定。
近期忙於內地演出嘅家英哥，喺7月9號精神奕奕現身香港一個頒獎禮，並且親自向大家分享身體狀況。家英哥話自己身體安好，目前冇任何問題，不過佢都話要多啲休息，因為打咗針藥之後，身體明顯係弱咗兼且令糖尿指數增高。
家英哥自己本身有糖尿問題，本身食藥嚟控制，但而經過醫生診斷後，指佢糖尿問題好嚴重，所以往後要改為打糖尿針，家英哥指稍後會再睇泌尿科醫生，有機會會打女性荷爾蒙針。問到阿姐係咪佢嘅私家看護？家英哥就即刻笑住放閃光彈：「佢被我看護。」
數度抗癌成功嘅家英哥，透過飲食同運動抗癌，亦不時跟阿姐四出旅遊享受人生。同時，家英哥亦積極演藝事業，日前就擔任莫文蔚西安演唱會嘅嘉賓，家英哥話因為西安係佢同Karen首次合作嘅地方，佢哋仲搵埋寫出經典歌《Only You》嘅梁華生，一齊喺當地嚟個大聚會。稍後家英哥會繼續同朱茵到內地巡演話劇，然後返港演出粵劇，11月就聯同阿姐一齊去不丹拍節目。
