資深演員羅浩楷自2017年淡出演藝圈，佳哥曾演出多部戲劇作品，例如《樂壇插班生》、《皆大歡喜》，憑精湛「扮嘢」功力，成為長壽綜藝《歡樂今宵》台柱之一，係無數人心中嘅經典。近日就有網民喺社交平台發文談及楷哥近況，提到「最近聽聞他的身體不太好，希望他身體健康」，令人憂心，另有人回應「身體唔係幾好，已經唔係最近嘅事喇」、「最近德福見過，一個坐輪椅，冇咩精神」。
早喺2004年楷哥拍攝《皆大歡喜》時就因大動脈閉塞，引致心絞痛入院，楷哥2016年就因患上椎間盤突出，頸椎長期受壓引致彎曲，而要長時間戴頸箍變成駝背，而喺2021年，楷哥作客鄧英敏主持嘅網上節目《老友鬼鬼傾吓偈》訪問時分享自己息影亦係因呢個身體原因，佢亦向其他傳媒透露自己一年醫療費高達約100萬，感恩太太對自己無微不至嘅照顧。
楷哥近日再接受訪問透露喺十幾年前發現患上柏金遜症，雖然聲線仍好有中氣，但佢表示「情況一般向下走」；楷哥又指近一兩年身體情況惡化，手腳活動能力都唔多好，需要靠輪椅代步，自己亦因身體問題已唔多出街，但自己鍾意到屋企樓下做「飛車黨」散散步。看淡生死嘅楷哥仲話分分鐘有病唔醫，因為自己好想死：「淨係坐喺度係冇意思。」佢閒時就鍾意彈結他、唱吓歌，自得其樂。
