視帝視后 陳豪 、宣萱 同 馬國明 作客 TVB娛樂新聞台節目《StarTalk》，接受主播 潘盈慧 專訪，大談熱播劇《執法者們》嘅拍攝點滴。
劇中飾演何依婷嘅爸爸，阿Mo話係一大挑戰，因為冇試過有咁大個女女，依婷喺劇中嘅演繹比實際年齡細，所以阿Mo唔覺得太困難。故事中跟依婷嘅父女關係麻麻，阿Mo話呢種情況係好易喺現實生活出現，因為爸爸太投入工作而忽略囡囡，佢話幸好而家自己嘅囡囡仲肯坐自己大髀，希望將來唔會有類似嘅炸彈。
馬明喺劇中被 陳瀅 暗戀而大獻殷勤，笑言自己嘅角色好笨，一心想為朋友報仇而忽略身邊有位好女仔出現，佢又預告最後會醒覺。戲中陳瀅嘅角色會煲湯送暖，馬明話現實生活中就未遇過，因為從未試過被女仔追求，不過佢就冧冧豬講而家太太 湯洛雯 當然有煲靚湯畀自己飲。
兩位人夫講到 黃宗澤 喺拍攝期間，不時下廚去畀劇組食，阿Mo就話自己負責提供咖啡，而馬明就直認負責食。佢哋又話宣萱係劇組零食供應商，不停為大家提供零食，宣萱覺得大家開工好辛苦，所以休息時有零食去食吓會開心啲。宣萱又憶述一件往事，當年自己喺片場講笑而被前輩當頭棒喝，而呢件事令佢好有得着。
