滕麗名 喺《愛‧回家之開心速遞》飾演 熊尚善 ，雖然忙住拍劇，但係佢都可以保持住十年如一日嘅靚樣。阿滕除咗注重養生之外，亦有定期做身體檢查同注意身體嘅警號。好似5月時佢就透露，因為突然其來嘅眼朦同出現飛蚊症，原來視網膜經已脫落，好在佢及時去檢查同治理而有驚無險。
而阿滕呢日出席保健品活動時進一步透露，因為有一日拍攝《愛‧回家》時，被拍檔 袁文傑 誤傷右眼，當時以為無大礙而未有求診，可能因為咁引致傷口變大，之後再發現視力變朦先入院檢查，就發現視網膜脫落9成，好在喺喪失視力前及時求醫。
阿滕話做完手術後經已無問題，但係佢覺得手術過程相當恐怖，更形容好似被激光射後腦嘅感覺。阿滕呼籲大家驗眼嘅重要，因為視網膜脫就算及時修復都會影響之後嘅視力。
《愛‧回家》最近加入新成員 劉洋 飾演細曹總，佢作為《中年好聲音3》嘅魔王級唱將，阿滕話暫時未有時間搵佢請敎唱功，因為每次見佢都忙於背劇本。而阿滕因為拍處境劇生活作息變成養生Mode，本時拍劇都需要捱夜，但係處境劇通常早上開廠，所以8年來都習慣早上5點起床，無疑上養成早起嘅習慣。
被問電影版《尋秦記》終於有上映期，有份演出嘅阿滕都話相當期待，但係因為太耐之前拍攝，佢對自己演出嘅情節記憶好模糊，唯一記得有一場戲，眾人都被古天樂要求化上白髮妝，只有阿滕唔駛，因為古仔話佢個樣後生同白髮妝唔夾。