保持健康體魄同身型，對於藝人嚟講係終身事業，唔少藝人熱愛運動，一來保持健康，二來可以減壓。唔少志同道合嘅藝人都透過運動而成為好友，甚至自組球隊或者聯盟搞活動及定期聚會。
圈中有唔少網球愛好者，近日佢哋就組成「香港藝人網球聯盟」喺正式成立嘅日子，佢哋選擇咗一齊聚會睇球賽，當中成員來自圈中唔同年齡層同界別，包括洪永城、梁諾妍、鄧智堅、黃子恆、林迪安、林國斌、區文詩、李思雅同孔德賢等，仲有久未喺港露面嘅劉愷威，大家一齊把酒睇波不知幾開心。而之前有參與過黃子恆舉辦嘅明星網球慈善賽嘅郭晉安、鄭子誠同徐榮呢晚就未有現身。
