天王郭富城為澳門個唱打造特別版演唱會，被喻為壓軸篇演出，城城特別調整歌單，務求同歌迷一齊回憶殺。佢邀請美術大師張叔平打造一系列嶄新舞台服飾，城城甫出場以一身亮白長褸，配以抽象派嘅白禮帽，聯同舞者們演繹《鐵幕誘惑》，氣勢十足。
城城勁舞之後，隨即展開回憶殺，包括《我想偷偷對你說我愛你》、《傷心的話留到明天再說》、《我為何讓你走》等，瞬間炒熱全場，掀起全場大合唱，城城早前擔任周杰倫演唱會嘉賓，佢好感謝周杰倫15年前創作咗《永遠愛不完》，而城城內心一直希望同Jay一齊合唱一次《永遠愛不完》，終於喺今次擔任嘉賓時，成就一次不一樣嘅回憶殺，真正回憶滿滿，非常開心，所以呢晚當場館響起《永遠愛不完》音樂，城城希望同歌迷延續呢份回憶殺。
今年壓軸篇特別新增延伸舞台，喺唱出《你是我的一切》及《強》時，歌迷全部湧到台前，算係城城同歌迷拉近距離嘅新福利，演唱會尾聲時，城城換上全新「著迷黑鑽舞衣」唱出《著迷》，大派禮物及教全場觀眾跳舞，各人如同置身夢幻大派對。
城城喺演唱會上，不時同歌迷互動同分享，佢真情剖白話：「做演唱會係消耗體能嘅工作，如果我想省力，我可以多唱慢歌，但係我不會咁做，仍然希望選擇唱跳難度較高嘅快歌，因為舞蹈係我嘅根！我好想多啲同大家分享我嘅舞蹈。」
一連兩晚，城城懷有身孕嘅太太方媛亦帶同兩位鐵粉囡囡專程嚟到為爸爸打氣，城城喺現場不時望向家人所身處嘅包廂，同寶貝女兒打招呼。澳門站演出，亦有不少圈中朋友前來支持，包括劉嘉玲、上山詩納同丁子高等。
