最近先後推出新作《搖籃凡世》同《無名指》嘅 許恩怡 ，近兩年先後參與過《焚城》、《贖夢》等電影，近日佢同 鄭伊健 主演嘅《久別重逢》亦不斷參與唔同影展，Natalie以香港演員身份到世界各地宣傳，繼獲提名香港電影金像獎最佳女主角後，Natalie喺香港時間星期二早上舉行嘅紐約亞洲電影節，獲頒發「亞洲新星獎」，更同《久別重逢》團隊一齊飛赴紐約。
今次Natalie同時帶同主演新作赴紐約參展，上台領獎後佢話：「好榮幸，好驕傲作為香港演員喺紐約得獎，因爲代表到香港本地團隊有幾認真、用心咁拍每一套戲。我亦覺得自己好幸運，呢幾年來一直同好有經驗、好善良、好有想法嘅導演仲有演員同團隊合作。未來，我哋會繼續做好香港電影！」
Natalie係繼繼2018年鄧麗欣獲獎後，成為史上第2位香港演員奪得「亞洲新星獎」，Natalie被問到未來目標時就話：「簡簡單單嘅，只係想繼續努力，腳踏實地地往前行。如果可以的話，去亞洲其他地方拍戲，亦想試一試其他題材，最近我覺得幫漫畫配音會好有趣。」
今次喺紐約同一齊主演嘅伊健哥哥「久別重逢」，不過就可惜未能一齊慶祝，佢話：「冇時間呀，我哋一齊做訪問、參加記者會，感覺都係一種慶祝，因爲我哋團隊喺一齊嘅時候，氣氛總係好好、好溫暖。」
Natalie返港就要宣傳即將新作《無名指》，佢話：「近排主要係宣傳《無名指》，然後8月要去馬來西亞參加《搖籃凡世》首映，因爲畢竟係一個關於馬來西亞嘅故事，亦係馬來西亞拍嘅一套戲，仲係導演同Fish(廖子妤)嘅家鄉。」
