前亞視花旦蔡曉儀 神隱廿多年後再度復出幕前，當年伴隨佢退出嘅仲有一個「被落降頭」傳聞。日前蔡曉儀接受傳媒訪問時，主動為事件闢謠，指「根本冇呢件事」。
蔡曉儀出道時憑古風氣質拍過唔少古裝劇，最經典嘅《我和春天有個約會》懷舊造型都相當殺食。不過喺2002年拍完《法內情2002》後，佢突然喺幕前消失，更傳出係因為佢搭上泰國富商惹禍上身，被落降頭。加上蔡曉儀嘅前亞視同事江美儀曾喺節目重提「降頭疑雲」，雖然無開名，但線索都令唔少人聯想係講緊蔡曉儀，令傳聞再添一層可信性。
蔡曉儀解釋，當年爆紅令引致壓力爆煲，令情緒問題加劇以致患上思覺失調，至於「降頭傳聞」就更係無中生有。因為自己根本無同對方展開感情，又點會有元配「一屍三命」？但因為當年噩夢過於逼真，所以蔡曉儀都誤信過自己被落降頭，更試過斥資6位數搵師傅解降，又試過因為情緒崩潰而兩度輕生。
被問到會唔會擔心思覺失調復發，蔡曉儀就話：「唔怕！因為個病一早好返，最重要係正面解決壓力。」佢更以自身經歷呼籲大眾要正視情緒問題，有事要以科學行先盡早求醫，疑神疑鬼只會令自己情況更差。對於當年喺片場情緒失控，都令佢表示「好對唔住團隊」，而佢亦澄清喺「化妝間便溺」嘅傳聞。
講到復出契機，蔡曉儀表示2014年已有意復出，不過自覺未準備好，所以專心打理家族服裝生意。直到兩年前重溫《我和春天有個約會》重燃戲癮，決心自薦參演網劇版。雖然已經年過50，但蔡曉儀亦唔擔心被貼上「過氣標籤」，表示最重要係「有熱誠」！
