新劇《璀璨之城》日前宣布為咗精益求精正進行劇本調整，一眾演員亦難得可以小休，女主角 張曦雯 就把握時間飛返美國芝加哥探親，男主角 張智霖 亦同太太 袁詠儀 爭取時間飛一轉，咁啱撞正《衝上雲霄2》播出12周年，Cool魔當然都要發文紀念下啦！
《衝上雲霄II》2013年7月播出時，新加入嘅Chilam飾演「Captain Cool」可以話係風靡萬千女士，揸飛機技術一流唔單止，仲要咁靚仔，真係迷死無數師奶同少女，而Chilam亦憑Cool魔呢個角色勇奪大馬視帝。
12年後劇集播出嘅7月15號，Chilam咁啱又喺飛機上，連佢自己都覺得係命中注定嘅巧合。呢個post亦吸引大批網民留言，大家除咗集體回憶12年前追劇嘅點滴，亦有網民搞笑話Cool魔係咪退咗休，如果無係點解會由機長變乘客？
