《中年好聲音3》季軍 劉洋 嘅首支個人單曲《別離開我》7月18號就會正式上架，由事前已經曝光嘅兩句，可以聽出首歌係一首情緒濃烈嘅慘情歌，配合劉洋爆發力十足嘅聲線，未正式公開已經可以預期氣勢滂薄。
新歌正式推出前夕，劉洋喺IG度po出自己親筆寫下嘅兩句歌詞「別離開我 感情就像煙火 ，最美花朵 都逃不過凋落」，令人意外嘅係劉洋手字寫得好靚，字體娟秀，同劉洋粗線條大漢嘅外表形成強烈反差。
網民睇到劉洋手字亦一面倒大讚，話佢唔止唱歌好聽，連寫字都咁靚，不過亦有網友搞笑話劉洋人咁大份，寫字點解咁細隻呀。
除咗分享自己手字，劉洋亦公開徵求網民分享自己嘅感情故事，只要留言自己最難忘嘅一次分離，就有機會得到劉洋送上親筆簽名單曲電子封面照一張。
