陳美齡 嘅媽媽 陳彭端淑 喺6月17號安詳離世，享嵩壽100歲，Agnes同家人7月16號喺天主教堂，為亡母舉行追思彌撒，到嚟送別陳媽媽嘅友好包括王馨平、資深傳媒人汪曼玲、劉天蘭、謝寧、玩具大王太太蔡李惠莉同前特首曾蔭權等。
陳家齊集四代人現身教堂，當中Agnes兒子更專程來港送別婆婆，Agnes亦喺儀式上獻唱媽媽生前經常唱畀佢哋六姊妹聽嘅童謠，以歌聲送亡母最後一程，唱完之後，Agnes道出「媽咪，我愛您！媽咪，我永遠懷念您！」
儀式後同二家姐陳曦齡接受傳媒訪問嘅Agnes，指媽咪過百歲高齡已經好感恩，但直言心情激動難受。佢又講到媽咪以往唱畀佢哋聽嘅童謠，好多都經已失傳，只係靠口傳，而喺儀式上獻唱嗰首童謠，係陳媽媽生前最愛一首，所以藉今次送畀媽咪，佢哋兩姊妹亦表示會將童謠口傳畀自己下一代。
陳媽媽當年支持Agnes追尋歌手夢，更陪伴住未成年嘅女兒出道，母女感情要好。佢亦謹記媽咪教導乜嘢工作都要做，唔好嫌棄工作，所以處理媽咪身後事時，佢仍然為慈善騷演出。陳曦齡指媽咪到後期都冇乜對佢哋鞭策，可能只係希望佢哋能夠一直為社會服務。
另外，佢哋透露媽咪心願係想同爸爸合葬喺跑馬地天主教墳場，而下葬日子就咁啱係Agnes 8月20號生日當日。