由蘇玉華、張可頤、林家棟、麥包夥拍元華、程可為及已故鮑方叔，演出嘅TVB經典劇《茶是故鄉濃》，近日喺TVB午夜時段重播，雖然呢套劇已係26年前嘅作品，但現今觀眾睇返依然令人回味，好多人大讚及懷念呢種鄉土劇情懷，覺得故事寫得好好。
飾演「少當家」嘅蘇玉華喺劇中要女扮男裝，擔起家業重要角色，同劇中麥包展開一段感情線。近日蘇玉華都有欣賞返呢套作品，仲搵返以前同演員、劇組大合照出嚟，並留言：「嘩！已經唔知第幾次重播『茶是故鄉濃』」。
相中見蘇玉華青春秀麗，一臉稚氣，坐喺大當家程可為身邊真係十足十兩母女一樣。唔少網民睇到呢輯相激讚劇集超級好睇，好嘅劇值得回味，仲話因睇咗呢套劇成為蘇玉華粉絲。
《茶是故鄉濃》喺1999年台慶劇，劇組當年為咗拍攝效果逼真，特意安排演員們遠赴廣西賀州取景，將大自然一面與茶園劇情融合，加上角色打造，令觀眾受落，該劇曾創下收視高峯，當年林家棟憑劇中方有為一角獲得「2000年度我最喜愛的電視角色」，令演藝事業推進。
