懷孕九個月嘅謝婷婷臨盆在即，不過熱愛打網球嘅佢完全冇放軟手腳，挺住巨肚都繼續馳騁球場，仲頻頻參加比賽，而且接連攞到兩座冠軍寶座，實在太勁！
婷婷喺IG貼出一張以孕肚頂住獎盃嘅相，並分享自己懷孕期間攞到嘅兩座冠軍，一個係懷孕24周同好友一齊贏得大師賽ITF700 W35雙打冠軍，另一個就係懷孕32周時贏得MT400省級W40單打冠軍，展現出超強球技。
預產期七月尾嘅婷婷透露，自己再過一個星期就生得，佢寫到「在過去9個月裡，我最感激的一件事，就是我的身體一直支撐著我，不僅僅是懷孕，並且在網球場上。致我的身體-謝謝你讓我繼續做我喜歡的事。」
婷婷除咗多謝球場上嘅夥伴，亦點名感謝另一半Mathew，「在這段狂野又美麗的旅程中，謝謝你陪我穩定度過，當我第三次報名單打時，你連眼睛都沒眨過。無論是幫我綁鞋帶，或是比賽過後幫我按摩背部，每一個小細節都感覺到你的愛，如果沒有你我根本做不到。」婷婷嘅分享，亦吸引鍾嘉欣留言大讚「我們的身體總是可以做出不可思議的事。」
