林奕匡最近挑戰擔任主持，每集邀請不同嘉賓遊車河，第一季邀請Gin Lee、Jay Fung 等歌手朋友傾吓偈、唱吓歌，第二季首集邀請容祖兒（Joey）作為嘉賓，二人雞啄唔斷，甚至傾到相機電池耗盡仍意猶未盡，除咗合唱對方新歌，更大訴心底話。
林奕匡曾係Joey網上歌迷論壇嘅版主，自中學開始已係Joey粉絲，佢好感激Joey擔任自己人生第一個演唱會嘅嘉賓，Joey亦對林奕匡好有親切感，「唔知點解你好似我屋企人咁」，林奕匡作為小粉絲，就自爆私藏《愛一個上一課》電台特別版：「當時專登搵加拿大DJ朋友俾個File我，得我有㗎咋！」Joey笑指自己都冇呢個版本：「記得我錄音嘅時候把聲好沙，但監製就話呢把聲好啱。」
Joey一直好欣賞林奕匡嘅作品，拍攝途中更主動邀歌：「你幾時作歌畀我？我呢世人一定要唱一首你嘅歌！」Joey希望可以喺演唱會與歌迷大合唱此歌。林奕匡坦言一直有呢個念頭，但有時越係想指定寫歌畀某人，顧慮太多因素反而更困難。Joey表示認同：「我最怕啲人因為要寫歌俾我，就寫得特別刁鑽，向高難度挑戰。」 兩人合唱林奕匡新歌〈無題時想起的人〉 期間突然下大雨，林奕匡忽然感性稱雖然而家擁有幸福家庭，但有時仍會感到Emo（情緒化）：「自己有 Struggle，但好似唔方便同其他人呻。」林奕匡希望給予家人最好生活，但有時需要工作而無法陪伴老婆同阿仔。Joey即送上鼓勵：「其實兩樣嘢冇衝突，我哋都希望每一方面能夠做到最好，冇任何嘢重要過家庭。」
