何超儀旗下藝人Iman Taheri推出首本寫真詩集，發布會上Josie以老闆身份撐場。Iman本身係一名醫生，係Josie老公陳子聰喺美國嘅主治醫生，喺子聰患病康復期間悉心照顧，因而同Josie兩公婆成為好朋友，Josie更成功幫Iman由醫生轉型為藝人，Iman為詩集影相，兩公婆仲親力親為親自指導。
Josie話影相當日，自己同老公朝早七點就去到現場幫手打點，Model出身嘅老公就教Iman擺靚仔pose，而自己就教Iman點樣投入情緒。Iman話因為自己眼太大，多得Josie從旁指導如何控制眼神，先可以拍出令人滿意嘅效果。
Iman除咗推出詩集，亦會演出Josie監製嘅新戲《拾荒法師2》，呢日見佢手上有唔少瘀傷，原來佢喺戲中有唔少打戲，除咗要接受武術特訓，仲第一次嘗試吊威也，至於吊威也嘅感受，Iman就搞笑話第一次吊完返到地面，感覺就好似卡通片咁有啲雀仔係頭頂飛。
活動當日現場媒體原本以為有機會見到子聰，不過最後佢都冇來到，Josie就話因為老公實在太忙，除咗要幫公司搞緊新項目，仲身兼電影翻譯，Josie讚老公係翻譯方面水準非常高，公司嘅電影可以參加國際影展，子聰絕對功不可沒。
