陳慧琳紅館演唱會於19號晚迎來第七場演出，呢晚邀請到影帝張家輝擔任嘉賓。呢晚家輝仲再次化骨龍上身，與Kelly合唱《眼睛想旅行》時，重新演繹戲中一段經典舞步，瞬間引爆全場沸騰！
Kelly上次為家輝宣傳電影《贖夢》時，以一身垃圾黑膠袋「垃圾婆」造型現身戲院力挺對方。所以呢次輪到Kelly主場，佢都特別換返一襲黑色訂制「垃圾膠袋」晚裝隆重歡迎家輝。家輝笑稱：「十年前演唱會我喺到，十年後我又係到，希望十年再十年你演唱會，我都可以參與下，到時候可以拉二胡、彈琵琶助興。」
自言以一身唱作歌手打扮到場嘅家輝，畀Kelly調侃佢係被大眾封為嘅「電影歌手」，因為話佢專門喺電影入面唱歌，對此家輝即時慨嘆：「傷口灑鹽時間又嚟！」
隨即大銀幕播放家輝喺唔同電影中嘅經典唱歌片，當中包括《化骨龍與千年蟲》入面嘅《灰色軌跡》、《金雞SSS》中嘅《誰明浪子心》，以及《中華賭俠》內改編版嘅《眼睛想旅行》。而喺Kelly揀唱《眼睛想旅行》後，本身安靜企喺旁邊嘅家輝，當歌曲去到中段，突然「舞魂覺醒」，重新演繹呢段經典舞台，之後Kelly仲加入一齊跳，睇到台下觀眾尖叫不斷。
而喺Kelly換裝時，曾經推出過兩張唱片嘅家輝，就笑言有機會嘅話都想開場演唱會唱歌畀大家聽，然後就唱出電影《贖夢》嘅主題曲《永遠的失眠》，呢次亦係佢首次公開演出呢首歌。
此外，受颱風韋帕影響，為顧及觀眾安全，主辦方將7月20日嘅演出，延期至7月27日，同一時間、地點舉行，已購買7月20日門票嘅觀眾可選擇以當日完整實體門票(連同票根)進場及按門票上原有座位就座觀看7月27日演出， 或選擇相關退票安排，有關細節請瀏覽主辦方Star Talent Limited社交平台公告。
