衛蘭 日前先擔任完 陳慧琳 演唱會嘉賓嘅 衛蘭 ，轉頭就身處上海繼續舉行世界巡迴演唱會，，今次係Janice首次於上海舉辦個唱，吸引逾萬歌迷入場。Janice以真摯音樂同動人故事，帶領歌迷走進音樂世界。
今次有機會喺上海開唱Janice既興奮又感動，為咗同歌迷更親近，更提早特意苦練普通話，希望與歌迷有更多互動。呢場演出仲首次自彈自唱全新歌曲
《Rainbow》，又分享對呢首歌嘅感悟：「彩虹對我來說代表希望和承諾，每個人的人生都會經歷風雨，但只要堅持，好日子終會來臨。無論你正面對工作挑戰、感情低谷，還是等待夢想實現，我希望你們都能找到屬於自己的彩虹。」
呢次佢仲邀請曾係同門師姐嘅 楊千嬅 擔任嘉賓，兩人合唱經典歌曲《愛才》，掀起全場高潮。千嬅之後話：「很高興能在衛蘭的演唱會上與她相聚，見證她人生中這重要的里程碑。她的音樂和聲音陪伴了我們成長，真的讓我感到非常驕傲，感謝Janice的邀請。」
而Janice亦為千嬅新歌《Live My Life》宣傳，呼籲大家支持，之後千嬅就分享：「這首新歌是我這些年人生的領悟，忠於自己的夢想才讓人生有意義。看到Janice一步步實現夢想，真的很不容易。」今年係千嬅出道30周年，Janice貼心準備一張18年前合照，頓時勾起兩人回憶。Janice指彼此狀態同當日一樣，而千嬅就幽默話：「為什麼化妝師那麼貴？因為他彌補了我們的距離！」隨後，衛蘭就以上海話介紹千嬅獨唱嘅《野孩子》。
Encore時Janice以《Singalongsong》向好友方大同致敬，又透露兩人曾為鄰居，時常一齊到寓所附近食糖水，又指大同至愛豆腐花，兩人經常一起聊音樂嘅往事。唱到一半Janice更哽咽落淚。
