黎明 同 雷頌德 終於再次合體。Mark近日由英國返港，擔任陳慧琳演唱會總監，難得返嚟香港，除咗工作之外，Mark亦趁機同老友食飯聚舊，繼同BIG FOUR、方力申、吳家樂等人飯聚後，終於都輪到Leon。
Mark喺社交平台上載咗一張同Leon嘅合照以及一碗令人垂涎三尺嘅叉燒飯，佢更寫道：「有人請我食黯然銷魂叉燒豬油撈飯」，唔少人網民見到Leon同Mark再合體，都興奮留言「omg 最完美的組合﹗等緊你哋合體，要一齊再合體做音樂做演唱會。你兩個真係改寫咗90年代嘅音樂圈」、「終於合體，期待畫面，無敵組合」、「正呀，黃金組合」、「等咗你哋好耐啦﹗」
Leon同Mark呢對最佳拍檔，當年合作無間，並肩作戰打造過無數經典作品，好似《眼睛想旅行》、《情深說話未曾講》、《只要為我愛一天》、《Sugar in the Marmalade》等等。日前Mark 接受電台訪問時，亦有談及當年曾因為創作問題同Leon吵大鑊，Leon更帶佢韓國夜店取經，對佢日後炮製跳舞音樂啟發唔少靈感。
Leon近年都有出新歌，但產量唔算多，好似最近佢就無預警推出新歌《單細胞生物》，而呢首國語歌就係由WE5作曲、小寒填詞、何丙監製。
