G.E.M.鄧紫棋嘅Fans注意喇！早前佢宣布相隔8年將重返香港，下月於啟德主場館開騷，門票開售就被秒殺售罄，即使宣布再加場仍然一票難求，而寵粉嘅G.E.M.宣布終極加開第5場，務求滿足所有歌迷入場嘅願望，加場門票星期五(25日)中午12:00公開發售。
《I AM GLORIA世界巡迴演唱會》係G.E.M.第4次大型個人巡迴演唱會，主題靈感取自G.E.M.本名Gloria，以爸爸為佢改嘅名擁抱初衷。G.E.M.希望同大家由「Gloria」出發，回溯音樂歷程，共同譜寫全新篇章，展露嶄新自我。
《I AM GLORIA》1.0啟程跨越亞、歐、美三大洲，巡演場次突破100場之勢，榮登全球女歌手巡演票房TOP 4，亦成為2024華語樂壇主題巡演票房總冠軍。今個夏天G.E.M.帶住加強版2.0到香港演出，每一個細節都精心打磨，令大家可以更沉浸感受「GLORIA」嘅人生故事，勢要令香港歌迷體驗難忘演出。
佢早前已推出巡演同名嘅《I AM GLORIA》重錄專輯，將經典舊作重新錄製，更特別收錄《天空沒有極限》嘅粵語版，相信有機會喺香港站演繹！
