方力申 同太太 葉萱 父親節宣布即將迎接新生命誕生，小方更喺日前音樂會上宣布太太懷嘅係女，亦喺公開活動難掩即將做爸爸嘅喜悅。
曾經係邪教受害人嘅Maple，兩年前一套國際紀錄片勇敢公開敘述自己受害經歷以及赴韓國出庭作證，事件一度成為國際熱話，唔少人都欣賞Maple嘅勇氣，
Maple喺完結官司後曾表示「一切都可以重新開始」，而醉心藝術嘅佢亦不時喺社交平台分享畫作。最近Maple就分享一幅名為《家是你最大的靠山》嘅作品，又分享創作心程話每幅畫都有自己嘅故事，呢幅畫喺婚前開始創作，而喺孕期完成。
Maple仲話，呢一切嘅開始係「他想要一座山，一個巨大的支撐。我問他最大的力量是什麼，他回答：他的家人。」，小方喺Post亦留言「Thank you」，相信呢位「他」就係小方喇！
除咗已重新開始建立美滿家庭，Maple亦將現身以「倖存者」做主題嘅紀錄片第2季，製作人曹聖鉉表示自己被Maple故事所感動，亦形容佢係一位「奇蹟般的女性」，以及喺Maple身上見到「活下去的理由」。如今Maple可以走出過去陰霾，幸福迎接新人生，亦係大家最想見嘅結局。
