李克勤同太太盧淑儀都係羽毛球愛好者，不時會去睇唔同嘅羽毛球賽，早前兩人專程去到廈門睇蘇迪曼杯，見證中國隊蘇迪曼杯四連冠。兩公婆亦有不少波友，與羽毛球國家一級運動員 鄭愷Kai 更是好友，對方不時會上載與盧淑儀打羽毛球嘅照片。
日前克勤同盧淑儀及家人再到廈門旅行，身為陀地嘅鄭愷即化身導遊帶佢哋到唔同景點打卡。鄭愷將照片PO到社交平台，並於帖文中表示：「快樂來自與克勤哥、淑儀姐一家的相聚。南普陀、下午茶、吃飯、逛街、鼓浪嶼、家宴，我如同一個本地的遊客，開心的過了一個週末」。
相中所見，現年51歲嘅盧淑儀雖然素顏上鏡，不過仍風采依然，佢更全程貼身照顧要持拐杖櫈嘅奶奶，每張合照都必定企/坐喺奶奶身邊，完全係一個廿四孝好新抱。
