由彭發執導、張兆輝、王敏奕、羅蘭主演嘅驚慄懸疑電影《空心人》定檔8月上映。王敏奕為鬼導彭發，克服多年嚟拍驚慄片嘅恐懼，張兆輝希望藉此片，讓大家珍惜家人嘅可貴。
電影《空心人》講述一對夫婦痛失愛子後，妻子通過網絡尋求幫助，請咗一個被兒子「附魂」嘅布娃娃，結果家中開始發生一連串詭異事件。王敏奕向來抗拒拍驚慄片抗拒，鬼片同驚慄片都唔夠膽睇，王敏奕都好奇點解彭發導演搵佢做呢套驚慄片嘅女主角，本身唔識彭導，大家又都冇共同朋友，自己當年睇完彭氏兄弟拍嘅《見鬼》系列後，從此唔敢再睇呢類電影，不過王敏奕睇完呢個劇本後，「真心被故事感動，我當場想喊出嚟，但我忍住，費事嚇親導演」。
王敏奕喺拍攝過程中，彭導分享咗唔少拍鬼片嘅經驗，令王敏奕了解拍呢類電影嘅手法，最重要係鏡頭運用將恐怖氣氛，呈現喺觀眾眼前，王敏奕坦言上咗寶貴嘅一課，加上導演本身風趣幽默，又喺前輩張兆輝身上偷師，「演技上特別是情感戲，有不少得著，好享受同輝哥演對手戲，每一場戲自己拍完都好有滿足感」，整個拍攝過程都好開心，讓王敏奕對拍鬼片有另一種體會。
張兆輝喺戲中飾演一位因妻兒離去而變得沉鬱嘅角色，情感處理上好複雜，心情又愛又恨，簡直身心疲累。張兆輝同樣係甚少拍驚慄或鬼片：「一嚟故事吸引、二係因為彭發執導。我自己身為父親，睇呢個劇本時真係被故事中嘅一家人所感動，嚴格嚟講呢部電影係透過驚慄手法拍攝，加上有羅蘭深入民心『龍婆』形象，而彭發本身又擅長拍呢類電影。」張兆輝透露大家會以為係一部鬼片，但彭導係想講親情，對太太同阿仔嘅愛，作為丈夫同父親，不惜為家人犠牲。 張兆輝讚戲中飾演「太太」嘅王敏奕夠聰穎，有演戲天份嘅好對手，佢都期待再同王敏奕合作。
張兆輝同彭發合作過幾部電影，記得有次因劇情改動，張兆輝原本戲份被刪減，當時彭導承諾日後若有好角色一定補償，直至幾年後，彭導搵佢演出新戲男主角，張兆輝得知對方對承諾仍銘記心中，讚「喺呢行真係好難得，佢真係一個有心人」。此外，拍攝期間彭導太太重病在身，照顧太太之餘，亦要繼續工作維持生計，努力賺取醫藥費，張兆輝同王敏奕看在眼裡都覺得好心疼，但彭導非常努力做好自己崗位，令兩人更敬佩彭導嘅專業。
