由「亞洲男神」許光漢同手袁澧林主演，張艾嘉監製、龔兆平執導嘅新戲《他年她日》即將喺中秋節盛大上演，電影團將喺8月29日於昂坪市集舉行大型亞洲記者會。
電影故事描述大地震將世界一分為二，矗立於海中央嘅「重力牆」扭曲兩邊時間與重力，「優日區」嘅一天，係「長年區」嘅一年。而喺電影公司發布嘅全新預告可見，劇組不惜工本花近一年時間製作之逼真震撼嘅CG特效視覺，刻劃出戲中兩區嘅絢爛壯闊浩瀚場面。許光漢同袁澧林呢場相隔兩地嘅遠距離愛戀，經歷重重困難，更講出揪心對白：「雖然我們的時間不一樣，但愛你的瞬間已註定永恆」，令觀眾倍加期待。
電影班底非常強勁，有美術大師文念中擔任製作及藝術總監，聲音部份就有電影音效大師杜篤之操刀以及由朱芸編主理原創電影音樂等。故事就由張艾嘉攜手導演龔兆平共同編劇。
龔兆平表示當初創作靈感係由一段模仿電影慢動作嘅搞笑短片引起，張艾嘉就結合自身參與世界宣明會嘅經歷，設定「優日區」嘅小鴿子醫療團隊到「長年區」從事無國界醫生嘅工作。而「愛如何改變一個人」係張艾嘉最想透過呢部電影傳達俾觀眾嘅核心，佢認為「心中有愛的那份力量非常巨大，甚至足以改變一個人的一生」。
