關智斌Kenny 相隔四年終於推出廣東新歌《永遠的彼得潘》，呢日佢作客《StarTalk》同主播 許文軒 Edmond Hui 大談呢首以小飛俠Peter Pan做靈感嘅新作。
Kenny就話，Peter Pan係一個有啲頑皮同搗蛋嘅角色，加上現實中真係有一種心理現象叫「小飛俠症候群」，唔想長大、唔想接觸世界。而新歌想表達嘅係，長大後會有好多事選擇妥協，選擇做一個自己不喜愛嘅人。不如抽空搵返自己內心中嘅小飛俠。
Kenny出道多年，但外貌仍然凍齡不變，佢就認為一切係由心態影響。Kenny自認似Peter Pan，因為佢會用樂觀心態面對世界，就算處於低谷都唔會怨天怨地，反而無論處於咩環境都會搵到可以做嘅事。佢仲話自己唔會為人生劃線，反而隨心所欲，想做咩就去做，好好享受當下。
講到今年工作大計，Kenny形容自己以前只想做歌手，但係而家想向「表演者」身份出發，自己亦會投入做好Peter Pan計劃，希望可以做到一個以小飛俠做主題嘅演唱會。至於點解會突然有呢個渴望同轉變，Kenny就話皆因自己參加咗一個內地嘅表演競技綜藝節目，要喺三星期內由冇到有做出一場完美表演，而且係團體式作賽，所以會更加想做好。Kenny仲話自己當時試過晚晚排練到凌晨三、四點，又試過吊住威也演住戲唱歌，呢啲經驗令佢開竅，想成為一個好嘅表演者。
